09/04/2009

3.2.1 Lès travaus / les travaux: secteur primaire: à l' cinse / à la ferme

1cinseMîtchamptchèréyedifoûrBorci

 

râyadjedèscrompîres

 

Emile WENKIN

Mîtchamp (Bastogne)

Extrait de "Ké Novèle?", Musée de la Parole au pays de Bastogne, déc. 1988.

 

Li râyadje[1] dès crompîres[2]

 

 

Quand dj’asto gamin, dji m' rapèle qu' on plantot brâmint[3]  dès crompîres, pus d' deûs hèctares. Alors', à scole, on-n-avot dès condjîs sêsoniès qu' on loumot[4] ça, po râyi[5] âs crompîres. I falot brâmint dès djins: gn-è v'not d' Mwin.nèt, d' Arloncoût, do Potau èt do l’ tanerîe. Is v'nint en vélo, dès cis à pîds oute [6]dès tchamps.

Papa f'jot lès pârts di chakun, qu' i markot  avou dès gnèsses[7]. Mês gn-avot  dès toûrsiveûs[8] qui lès r'culint po-z-avèr fêt d'vant lès-ôtes èt il alint mougni dès meûres[9] dins l' hoûrlê[10] ou is s'  coûtchint su lès satchs en rawârdant[11] la râyeûse[12].

Gn-avot qui ramassint à gnos[13] pace qu’ il avint mâ[14] l' dos. On-n-alot deûs par deûs,  on p'tit  avou on grand po pwarter l' tchèna[15]. Papa n’ fèjot qu' covri âs motes tote la djoûrnée, dispû l’ matin jusk'à l’ nut'. I catchot d' abôrd lès crompîres avou do strin d’ grin èt pus, i mètot la tère, mês i n’ falot nin rovyi[16] di fé dès tch’minées qu' on r'catchot à l'  îvièr.

L’ pus bê dès momints, ç' astot quand on buvot l' cafè. On s’ choûrbot[17] on pô lès mwins avou on satch ou dins lès-ièbes, lès tartines gostint on pô la tâte[18], mês l’   apétit astot bon. Ç’ astot co bin l' ocâsion d' foumer sa pûrmîre cigarète. On tossot on pô mês on f'jot[19] l' ome, surtout qu' i-gn-avot dès coméres[20]. A l’ nut’,   quand lu s'lo s' coûtchot, i falot ramasser lès satchs po lès vûdi à l’ mote.  So ç’ timps-là, lès-èfants ramassint lès satchs vûdes, lès tchènas èt lès banses[21]. Et pus tot l' monde ripurdot[22] s’ paletot èt on potchot[23] su l’ tchâr[24], bin hodes[25] avou s' mâ d'  dos, mês contints d’ aler soper. En-z-èralant[26], on-n-avot co la fwace di s' bate  su l’ tchâr.

 

 

in : LD, 3, 1989, p.24-25



[1] arrachage

[2] pommes de terre

[3] beaucoup

[4] appelait

[5] arracher

[6] au-delà de

[7] genêts

[8] farceur

[9] mûres 

[10] dénivellation  marquant la limite entre 2 terrains

[11] attendant

[12] arracheuse

[13] genoux

[14] mal

[15] panier

[16] oublier

[17] essuyait

[18] tarte

[19] faisait

[20] filles

[21] mannes

[22] reprenait

[23] sautait

[24] chariot

[25] fatigués

[26] èraler : retourner

07:42 Écrit par justitia & veritas dans Général | Lien permanent | Commentaires (0) |  Facebook |

Les commentaires sont fermés.